،،
اللي بقى لي من الايام وفيته
والضيق لو ينهمر تشربه ودياني
ما هي كبيره علي والحزن غنيته
ولاهي غريبه اذا وقتي تحداني
الخوف يامن نبشت القلب وادميته
لا عشت زهرة شبابك وانت وحداني
كم جرحه اخذته من الاحباب ضميته
وجروح قلبي زكاة الحب خلاني
مطعون عادي جفا الاقراب داويته
تعبان مبطي ردى هالحظ خاواني
صدمه بسيطه هوان الحال مريته
مقرود ادري واذا حرمان عداني
ما فاح هم لك الله ما تقهويته
ما مر حزين بغيري ما تبلاني
ياما وياما من الخلان عديته
الا بصاحب بعد عشره تناساني
ازريت لنسى غيابه لين ناديته
والموت لامن تجاهلني وجافاني
وينه يجيني وكل عتاب كنيته
يا ليت يدري بعد فرقاه وش جاني
من كنت طفل وانا ارجيه في بيته
شيبت واثره على هالحل خلاني
حتى جناح العتب لارضاه ذليته
ما طرت بعده فرح من ذل جنحاني
يا قلب صبرك ترى كل شي سويته
ما كان افضل من اللي كان بإمكاني
لو بي قوه على الهجران خليته
لو بي ذره من النكران يفداني
الجرح ارحم اذا يرجع من اغليته
مجروح فدوه ولكن صعب وحداني