يا حروفي ودعي صمت الكلام
وإكتبيني كيف ودك تكتبين
ما علي شرهه ولا قولة ملام
دام طبع الوقت عيا لا يزين
حاولي تحكين من دون احترام
للوعود الكاذبه او للسنين
مر عمري ظلم عامٍ بعد عام
والبراءه حآيره عيت تبين
استثيري ذكرياتي والسلام
فتشي في صفحة العمر الحزين
وإكشفي وشهو الحلال من الحرام
كيف يقبل منهجه دنيا ودين
خلي العالم تتوب من المنام
في متاهات الهوى واسم الحنين
كذبتين بين غدر وبين آثام
وحسرتينٍ بين جيم وبين سين
لا تجيها وانت ما عندك حزام
لين تقرا في رياض الصالحين
وثق الخطوه وسر يم الامام
ووكل امرك يا عسى ربك يعين
كل شي تفعله حسب النظام
لا يهمك لافتات الفاشلين
عط حياتك فالزمن قدر ومقام
واجتهد والله مع اللي مجهدين
لا يغرك ساري الدرب الظلام
مع همومه لو ضحك يبقى سجين
خذ كلامي في سجل الاهتمام
وانت عارف يا فهيم ويا فطين
لا تعيش الشوشره والازدحام
السعه والزم دروب الغانمين
فرصتك ما كل مره في سلام
لا تمادى في اليسار وفي اليمين
خاوو رجل في الخفى صلى وصام
يخشي ربي كل وقت وكل حين
واكسب اللحظات مهما العمر دام
اللقاء قدام رب العالمين
يوم لا ينفع خوال ولا عمام
وامك اللي جابتك بك تستعين
كل واحد يرتجي رب الانام
واقفيين وعاريين وخايفيين
يا كريم فوق مدات الكرام
لطفك الطف وانت اكرم الاكرمين
موضوع: يا حروفي ودعي صمت الكلام 
2013-03-07, 19:47
