زبد زيف الدوار

يازبد زيف الدوار طل بعد التوهة قيف
‏........
والحمام المرة طار
رك فوق كتف النهار
شر فوق النسمة طيف يبس الدمع الزريف
شوقو حار باللهفة طار
شال من الشمش الحمار
لون الكون الهديل
فرتك الزيفة الغمام رشرش النغم الوريف
رد للجرف الخدار
مد للارض الخريف
دوزن الخيل الصهيل
رقصت عازة الخليل
صفق الطر في الصغار كيف العصفورة كيف
بين فرقة الليل وسيف
نام علي جنبينو تار
بينو والنار ,الصريف فر للفجر المضار
مريل النيل الاصيل
قيفو سوي الصحرا بار
فرق البكرة ....النضار
بتقوا اعواد الصريف وانطفت نار النزيف
لامكاجرة لانقار
لامتاجرة بي شهار
القميري ...نقذ حوار قص قبة شيخو زار
يازبد زيف الدوار
كلو ينتهي بالحوار
‏.......
جملة ياامات ابشرن بالقميرات البياتن
بي حياتن
والسيوف عرضن حلاتن
فوق خيول العز غلاتن
يلصف الدمور,,,حرير
الزغاريد ...البلاليل...التغاريد...المواويل
النسيمات اليتاتن...الغمامات اليهاتن
البشارات اليواتن
الاشارات الكرامات....السلامات
الكليمات...ياحلاتن فوق لهاتن
تية كيف؟
حمد أحمد؟سبتو كيف؟
أبكر ...اوهاج.....جوزيف
ام سعيد خليته كيف...البلد كيف ؟الديار؟
بينه بينكن لا الحصار
لا الجواسيس الكبار
لا الاباليس الصغار لا المطاميس العكار
لامتاريس لاجدار
لافواصل....الاجار....
لاتلاتل لادمار
لامشانق ,,لاخنادق,,لابنادق ,,لانزيف
بينه بينكن كم مطار درب واصل كم قطار
شوق يلهلب في الرصيف هيي سلام .
.من زول رهيف
‏.....
احنا في ايدنا الخريف
ونيل متمسح ماب يقيف
اي علي كيفنا البذار العشم والاخضرار
احنا في ايدينا السلام
ايد تدلي الكلمة سيف وايد تعلي السيف كلام
يازمان الانكسار ,,احنا فينا الانتصار
ايوا ورينا الحمام وين بلود عيشو الوريف
وطار مسك درب النهار
ياحمامة مع السلامة
مع السلامة وباالسلامة
تمشي بي درب السلامة توصلي الناس العشامي
وانت ياكبس القيامة ..معاك سلامة
يابقس ليل الدوار
الحرب لازم تقيف
وتاني زرقاء اليمامة ماتشوف شدرا يسير
الا لافوق
فوق تسامي
زي سماحة الزول نضير
وقام حجر بت الرسول لون الغيم بالوسامة
وبابتسامة هي الخريف
تنقرع ريح الدمار
وينتهي الزمن
النزيف
يبتدي
الوطن العمار
وينكفي الهوس السخيف
ياميامين ياكتار ياغلابي الدنيا كيف
قدر ماوسعت بحار في النهاية بحوشا قيف
لما فوق الواطة نقعد ,,,,فالحرب تفتر ......تقيف
‏(من روائع الشاعر الكبير حميد وهو ينادي بوقف الحرب ..فهل من مستجيب...... الكلام ليك يا المطير عينك)

‎