اروع ماقيل من الشعر السودانى (1)

تاني كاتب لي خبارك
مختار دفع الله

تاني كاتب لي خبارك
إنت قايل إنو لسة قلبي تايه في مدارك ؟!
دي الديار خليتها ذاتها لما ضاقت بي ديارك
والبعاد الشايفو قاسي .. ما زمااان كان بإختيارك
إنت فاكر بنسى جرحك جيت تنمِق في إعتذارك ؟!
لما رُحتًّ تجور عليًّ ورُحتًّ أبعِد عن مسارك
تاني كاتب لي خبارك ؟!

دا الجواب الجاني منك عندي صار ما ليهو قيمة
والهوى الكان بيني بينك عدى بالشوق والهزيمة
وهسي لما طريت هوايا وقصة الذكرى الأليمة
جاي تاني عشان تعاوِد للحكايات القديمة ؟!

ويبقى ردي علي جوابك : يا جميل الرجعة لا لا
كوني أرجع ليك تاني ألف مليون إستحالة
والفُراق إنت البديتو يوم حرمتُّ الروح وصالا
وإنت عارف البادي أظلم إيه لزوم يعني الرسالة

الكلام الفي جوابك كان بعِز علي زمان
قبل ما تغدِر عيونك وقبل ما يخونِّي الزمان
إنت قايل قلبي بنسى فترة الذُل والهوان
لا لا وألف لا لا
دي الكرامة العندي أغلى من عيونك والحنان

إنت قايل إني ممكن ليك أرجع تاني مرّه
لا لا وألف لا لا
دا الجرُح مهما إستمرّ لو حصل طيفك غِشاني
ومرّ في ذاكرتي مره ويبدأ ينزف تاني مره

يا حليل أيام عيونك كان بتلهمني المسرة
أصلو كان خادعني لونك والبريق الفي عيونك
والكلام القلتو ليًّ كان بيخدع فيني زيفو
والجرح في قلبي نوسر وديما زايد في نزيفو
وكنت برضو ممكن أهديك نور عيوني
عشان عيونك مني يرضو

أصلي حاسس طول سنيني إنو أشواقي وحنيني ...
نقطة الضعف اللي فيني ...

إلا هسة إنت أنسى .. وحاول أنسى .. وحقو تنسى إنو كان بيناتنا قصة
وأصلو ما تعشم عيونك إني بهواك إنت لسة

إنت لو فاكرني بحزن شان فراقك أو قساك
تبقى موهوم في عواطفك أصلو قلبي زمان نِساك
وإبتديت أنساهو ليلك والسنين الراحو ديلك
وأنسى جور كل المآسي الفيها كم قاسيتو ويلك
إنت لو فاكرني بحزن شآن فُراقك يا حليلك يا حليلك

دائما متميز في الانتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك

لكـ خالص احترامي

» اروع ماقيل من الشعر السودانى (2)
» من روعة الشعر السودانى
» أجمل ماقيل في الحب
» من جميل الشعر وحلو الكلام
» "عزومة عشاء" من الحضرى لجهاز المريخ السودانى